Биыл Нью-Йорктің әйгілі сахнасы Madison Square Garden-де Димаштың концерті өтеді
АЛМАТЫ. KAZINFORM — Алматыда Димаш Құдайбергеннің фан-кездесуі өтіп жатыр.
Кездесу барысында ол Нью-Йорктің әйгілі Madison Square Garden кешенінде «Stranger» концертін өткізетінін жариялады. Концерт осы жылдың 5 қарашасына жоспарланған.
Бұған дейін Димаш Құдайбергеннің «Stranger» туры Барселона, Берлин, Лондон, Рига қалаларында өтетіні хабарланған болатын.
Сондай-ақ «Балқадиша» әнін татамиде орындап әлеуметтік желіде танымал болған Иса Бекболат Димаштың арнайы шақыртуымен өнерпаздың бүгінгі фан-кездесуіне келді. 14 жастағы Иса алғаш рет үлкен сахнада — Almaty Arena-ға жиналған 8 мыңнан астам адамның алдында ән салды. Димаш Құдайберген жас өнерпазға өзінің ақ-тілегін айтты.
Бүгін Димаш Қытай телеарнасы көрсететін әншілер байқауының продюсері болатынын хабарлады.
Сонымен қатар ол Алматыда өткен фан-кездесуінде жанкүйерлерінің сұрақтарына жауап берді.
Бұрын Димаштың бүгінгі фан-кездесуіне 40-тан астам елден жанкүйерлер келгенін жазғанбыз.
Осы айда Димаш Құдайберген белгілі қазақ ақыны әрі жазушысы, қазақ әдебиетінің негізін салушылардың бірі Сәкен Сейфуллиннің әніне түсірілген жаңа бейнебаянның тұсауын кесті.
