Биыл Өзбекстанда 200 мың азамат шетелге жұмысқа жіберілуі мүмкін

ТАШКЕНТ. KAZINFORM – Өзбекстан Ақпарат және бұқаралық коммуникациялар агенттігінде өткен баспасөз мәслихатында Министрлер кабинеті жанындағы Көші-қон агенттігі басшылары мәліметінше, тек 2024 жылдың өзінде 161 800 азамат шетелге жұмысқа жіберілген, деп хабарлайды Kazinform агенттігі ӨзА-ға сілтеме жасап.

Әлемде шамамен 300 миллион халықаралық мигрант бар. Бұл – әлем халқының 3,6%-ы. Мәліметтерге сәйкес, халықаралық мигранттардың 48 пайызы — әйелдер, 38 миллионға жуығы — балалар, 4,4 миллионы — студенттер, 164 миллионы — еңбек мигранттары. Олардың 75 пайызы еңбекке жарамды жастағы (20-64 жас) адамдар.

Мамандардың айтуынша, шетелге жұмысқа жіберудің бес негізгі кезеңі бар, олар бірінші кезекте әлеуетті жұмыс берушілерді табу, шетелде жұмыс істегісі келетін үміткерлерді анықтау және конкурстар өткізу, тіл мен мамандық бойынша мақсатты оқыту, кету алдындағы құжаттарды дайындау, құқықтарын қорғау болып табылады.

Биыл Еуропа, Азия және Тынық мұхиты елдері, араб елдері, ТМД елдері және Солтүстік Америка аймақтары сияқты шет елдерде 200 мың азаматқа жұмысқа орналасуға көмектесу жоспарланып отыр. Оның ішінде 40 мың азамат ағылшын, неміс, корей, жапон және орыс тілдері сияқты шет тілдерін меңгереді. 60 мың азамат медицина, көлік жүргізу, дәнекерлеуші, құрылыс және автомеханик сияқты мамандықтарға оқытылады.

Таңдап алынған үміткерлерге жұмыс орнының талаптары, этика және ішкі тәртіп ережелерін сақтау қажеттілігі, шет мемлекеттердің тілі, мәдениеті және заңнамасы туралы түсінік беріледі.

Еске сала кетейік, өзбекстандық футболшы Хусанов Манчестер-Ситиде ойнауы мүмкіндігі жайлы жазған едік.