Биыл жоғары білім гранттарының 99%-ы игерілді – министрлік

АСТАНА. KAZINFORM – Ғылым және жоғары білім министрінің орынбасары Гүлзат Көбенова биылғы оқу жылына бөлінген 77 мыңнан астам гранттың 99 пайызы игерілгенін мәлім етті.

- Биыл ұлттық бірыңғай тестілеуге 210 мыңнан астам талапкер қатысты. Оның ішінде 160,5 мың адам немесе 76,35% жоғары білім алуға қажетті шекті балды жинады. ҰБТ-ның орташа балы 69,42 болды. 2025 жылы мемлекеттік білім гранттарының конкурсына 113 мыңға жуық өтінім берілді, бұл өткен жылмен салыстырғанда 9 мыңға артық, - деді вице-министр.

Оның сөзінше, биыл талапкерлерге 77 мыңнан астам грант бөлінген.

- Биыл жоғары және жоғары оқу орнынан кейінгі білімі бар кадрларды даярлауға 93 232 грант бөлінді, оның ішінде 77 084 грант жоғары білімге арналған. Конкурс қорытындысы бойынша гранттар 99% көлемінде игерілді, - деді Гүлзат Көбенова.

Бұған дейін Астана әкімдігі бөлген 526 грант педагогикалық мамандықтарға үлестірілгенін жазған едік.