Былтыр елде табиғи және техногендік апаттардан 744 адам көз жұмған

АСТАНА. KAZINFORM — Былтыр елімізде 744 адамның ажалы табиғи және техногендік апаттардан келген. Бұл туралы Экология және табиғи ресурстар министрлігінің 2023 жылғы қоршаған орта ахуалы туралы ұлттық баяндамасында айтылған.

— Төтенше жағдайлар министрлігінің мәліметтері бойынша 2023 жылы табиғи және техногендік сипаттағы 12 891 төтенше жағдай мен оқиға тіркеліп, салдарынан 1 942 адам зардап шекті. Оның 744-і қайтыс болды, — деп жазады министрлік сарапшылары.

Министрлік мәліметі бойынша таулы аймақтарды үдемелі игерудің салдарынан кейінгі 5 жылда көшкін қаупі бар аумақтардың саны 599-дан 619-ға дейін өскен.

— Төтенше жағдайлар министрлігінің деректері бойынша 2023 жылы 2022 жылмен салыстырғанда су тасқынынан зардап шеккен елді мекендердің саны 2 еседен астам, тұрғын үйлер саны 1,8 есе өсті, — деп жазылған құжатта.

Былтыр елде тіркелген өрт саны 2022 жылдың көрсеткішінен аз болғанымен, шарпыған аумағы әлдеқайда көп болған.

— 2023 жылы тек республиканың орман қорында 810 орман өрті болды (Павлодар облысы — 207, Абай ауданы — 191, Ақмола облысы — 107, Шығыс Қазақстан облысы — 77, Қостанай облысы — 50, Қарағанды облысы — 45, Алматы облысы — 30, Солтүстік Қазақстан облысы — 27, Қызылорда — 24, Ақтөбе — 18, Батыс Қазақстан, Жамбыл, Жетісу — 7, Атырау — 6, Түркістан — 5, Шымкент (1), Ұлытау (1). Өткен жылдың сәйкес кезеңімен салыстырғанда орман өртінің саны 1%-ға, өрт аумағы 13%-ға, материалдық шығын 7,9 есеге артты. Сондай-ақ, 2023 жылы өткен жылмен салыстырғанда дала өрттері санының 48%-ға азаюы, ал олардың аумақтарының 27%-ға ұлғаюы байқалады, — деп жазады министрлік мамандары.

Бұған дейін хабарланғандай, Алматы метросында мерт болған зағип жолаушының құлаған сәті видеоға түсіп қалған.