Былтыр креативті қызмет экспорты 250 млрд доллардан асып түсті – Үкімет отырысы

АСТАНА. KAZINFORM – Елімізде 2019 жылдан бері креативті экономика 3 есе өсті. Бұл туралы Үкімет басшысы Олжас Бектенов мәлім етті.

- Былтыр креативті тауарлар мен қызметтердің әлемдік экспорты 250 млрд доллардан асып түсті. G20 Insights зерттеу компаниясының болжамына сәйкес 2030 жылға қарай креативті экономиканың үлесі әлемдік жалпы ішкі өнімнің кем дегенде 10% құрауы тиіс. Мемлекет басшысы халыққа Жолдауында креативті индустрияны дамытуды қолдау шараларының топтамасын әзірлеуді тапсырған болатын. Тиісті заңнамалық база қабылданды, - деді Олжас Бектенов Үкімет отырысында.

Премьер-министрдің мәлімдеуінше, креативті экономика 2019 жылдан бері 3 есе өсті.

- Алайда жалпы ішкі өнімге қосқан үлесі салыстырмалы түрде әлі де төмен деңгейде, 1% шамасында. Сонымен қатар кейбір «шығармашылық» салалардың өсу қарқыны жекелеген өндірістік секторларға қарағанда жоғары болып отыр. Былтыр компьютерлік ойындарды әзірлеу саласы жалпы қосылған құнға шамамен 460 млрд теңге қомақты үлес қосты, - дейді ол.

Еске сала кетсек, былтыр Мәжілістің жалпы отырысында креативті индустрияны дамытуға қатысты жаңа нормалар енгізілетіні қаралған еді.