Биологиядан халықаралық олимпиадада қазақстандық оқушылар 3 күміс, 1 қола жеңіп алды

НҰР-СҰЛТАН. ҚазАқпарат - Биологиядан халықаралық олимпиадада (IBO-2022) қазақстандық оқушылар 3 күміс және 1 қола медаль жеңіп алды. Бұл туралы Оқу-ағарту министрі Асхат Аймағамбетов әлеуметтік желідегі парақшасына жазды, деп хабарлайды ҚазАқпарат.

«Осылайша, оқушыларымыз былтырғы көрсеткішті жаңартты. Олар өткен жылы 1 күміс, 2 қола медаль жеңіп алған болатын.

Ереванда (Армения) өткен білім жарысына әлемнің 64 елінен 250 оқушы қатысты.

Еліміздің намысын Нұр-Сұлтан, Алматы және Өскемен қалаларынан 4 оқушы қорғады. Ал бұл оқушының барлығы беделді олимпиаданың жеңімпаздары атанды.

Ұлттық құрама қоржынына Ерасыл Темірбеков, Дінмұхамед Омар және Әлихан Жұмағалеев күміс медаль әкелді. Ал қоланы Бақдәулет Ерназаров жеңіп алды», - деген ведомство басшысы о қушыларды лайықты жеңістерімен құттықтады.

Фото: www.facebook.com/askhat.aimagambetov