Биологиялық әралуандықты қорғау қорын құру керек – Президент

БУРАБАЙ. KAZINFORM – Биологиялық әралуандықты қорғау қорын құру керек. Бұл туралы Ұлттық құрылтайдың IV отырысында Мемлекет басшысы Қасым-Жомарт Тоқаев айтты.

- Адамзаттың бүлдіргі іс-әрекетінің кесірінен Каспий итбалығы, қызғылт қоқиқаз және басқа да ерекше жан-жануарларға қатер төніп тұр. Біз табиғаттың осы бір сыйына барынша назар аударып, оны сақтай білуіміз қажет. Сондықтан Биологиялық әралуандықты қорғау қорын құру керек деп санаймын, - деді Президент.

Қасым-Жомарт Тоқаев Мемлекет басшысы ретінде бұл ауқымды жұмыстың маңызы зор екенін көрсету үшін осы қоғамдық ұйымға өзі жетекшілік етуге дайын екендігін баса айтты.

- Бұған қоса, біз тағы бір қазынамыз – тазыны халықаралық тізімге енгізе алғанымызды айта кеткім келеді. Аң аулайтын айрықша қасиеттері бар қазақы иттің тұқымын енді бүкіл әлем біледі, - деді Мемлекет басшысы.

Бұған дейін Президент киік санын реттеу мәселесін қайта зерделеуді тапсырғанын жазған едік.