Бірнеше көлікті қасақана зақымдаған астаналық ұсталды
НҰР-СҰЛТАН. ҚазАқпарат – Елорданың ЭКСПО қалашығы ауданында бірнеше көлікті қасақана зақымдаған ер адам ұсталды, деп хабарлайды ҚазАқпарат тілшісі.
Бұл туралы Нұр-Сұлтан қаласы полиция департаментінің баспасөз қызметі мәлім етті.
«18 қараша күні сағат 00.58-де «102» пультіне белгісіз ер қаңтарылып тұрған көліктерді теуіп жатқаны туралы хабар келіп түсті.
Тұрғындар бұзақыны өз күштерімен ұстап, полиция қызметкерлеріне тапсырды. Ол 30 жастағы қала тұрғыны болып шықты. Оның бұзақылық әрекетінен 6 көлікке зақым келген. Олардың иелері полицияға жүгінді. Залал сомасы анықталып жатыр», -деп жазады департаменттің баспасөз қызметі.
Полицияның хабарлауынша, жігіттің қолға түскен кезде мас болғаны сараптама қорытындысы бойынша дәлелденген.
«Полиция бөлімшесінде жігіт өзінің бұзақылық әрекеттеріне не түрткі болғанын түсіндіріп бере алмады. Аталған факті бойынша ұсталған азаматқа қатысты қылмыстық кодекстің 293-бабы бойынша сотқа дейінгі тергеу амалдары жүріп жатыр.
Полиция бөтеннің мүлкін бүлдіргені үшін жауапкершілік бар екенін еске салады», -делінген департаменттің баспасөз мәліметінде.
