Биткоин 105 мың долларға көтерілді

АСТАНА. KAZINFORM — Investing деректері бойынша биткоин бағамы 31 қаңтардан бері алғаш рет 105 мың доллардан асты, деп хабарлайды Kazinform тілшісі.

Өткен аптада токен 9%-дан астам өсіп, бейсенбіде 100 мың доллардың қалаулы деңгейінен өтіп, 2025 жылдың қаңтар айының соңынан бергі ең жоғары деңгейге жетті.

Өткен аптадағы өсім негізінен АҚШ пен Ұлыбритания арасындағы сауда келісіміне, сондай-ақ Қытаймен келіссөздерге деген үмітке байланысты болды.

АҚШ президенті бұл келісім аясында Америка 10% кедендік баж салығынан 6 миллиард доллар сыртқы түсім, ірі ранчо иелері, фермерлер және өндірушілер үшін 5 миллиард долларлық жаңа экспорттық мүмкіндіктер алады, сондай-ақ алюминий мен болат саудасы жүйесін және фармацевтикалық өнімдердің сенімді жеткізу тізбегін құру арқылы АҚШ пен Ұлыбританияның ұлттық қауіпсіздігін нығайтады деп атап өтті.

Бұған дейін Трамп Біріккен Корольдікпен жаңа сауда келісімі жасалғанын мәлімдеген еді.