Биыл білім беру грантын тағайындау конкурсына 68 мыңнан астам адам қатысты
АСТАНА. 26 тамыз. ҚазАқпарат - 2013-2014 оқу жылындағы жоғары білімі бар кадрларды даярлауға арналған мемлекеттік білім беру тапсырысы 35 053 грантты құрайды, оның ішінде 3 000 грант колледж бітірушілері үшін және 2 480 грант дайындық бөлімдеріне берілді.
Бұл туралы ҚР Білім және ғылым министрлігінің таратқан мәліметтерінде келтірілген.
«Білім беру грантын тағайындау конкурсына 68 742 адам қатысты. Республикалық конкурстық комиссия тамыздың 2-9 аралығында жұмыс жасады. Конкурстың нәтижесі бойынша 32 393 білім беру гранты тағайындалды. Қазіргі уақытта, жоғары оқу орындары грант иегерлерінің, сондай-ақ ақылы негізде оқуға ниет білдіргендердің құжаттарын қабылдауда», - делінген ведомство хабарламасында.
Ағымдағы жылдың қыркүйек айында мемлекеттік тапсырыс бойынша қалған 2 480 орын жоғары оқу орындарының дайындық бөлімдерінде оқу үшін қазақ диаспораларының өкілдеріне және шетел азаматтарына тағайындалады.
«Магистратура мен докторантураға 6 959 және 520 орын сәйкесінше бөлінді. Тамыздың 10-ы мен 14-і аралығында шетел тілі бойынша тестілеу жүргізілді. Тестілеуде барлығы 30 865 адам қатысты, онын ішінде 22 189-ы (75%) сәтті тапсырды. Казіргі таңда мамандық бойынша емтихандар жүргізілуде», - деп атап өтілген таратылған мәліметте.
