Биыл экономиканың өсу қарқыны 2,5% болды - Әлібек Қуантыров

АСТАНА. ҚазАқпарат –Ұлттық экономика министрі Әлібек Қуантыров Үкімет отырысында жылдың 10 айындағы экономикалық көрсеткіштерді баяндады, деп хабарлайды ҚазАқпарат тілшісі.

«Биылғы қаңтар-қазанда Қазақстан экономикасының өсім қарқыны 2,5 пайыз болды. Оның ішінде нақты сектордағы өсім 2,8 % , ал қызмет көрсету саласында 1,6 % болды. Оң өсу қарқыны ауыл шаруашылығы, ақпарат және байланыс, құрылыс және өңдеу өнеркәсібі, сауда, көлік және қоймалау салаларында тіркелді», - деді министр.

Оның айтуынша, негізгі капиталға салынған инвестициялардың өсу қарқыны 6,7%-ке жеткен.

«Экономиканың негізгі салалары бойынша инвестициялар көлемі өнеркәсіпте 4,1%, оның ішінде тау-кен өндіру өнеркәсібінде – 13,7%, сондай-ақ ауыл шаруашылығында – 7,4%, жылжымайтын мүлікпен операцияларда – 14,7%, көлік және қоймалауда – 8,5% ұлғайды», -деді ведомство басшысы.