Биыл Қазақстан 3 ғарыштық аппаратын ұшырмақ - Т.Мұсабаев

АЛМАТЫ. ҚазАқпарат - «Қазғарыш» Қазақстанның тапсырысымен жасалған жерді қашықтан зондтаудың қос аппаратын Францияның «Куру» ғарыш айлағынан ұшыратын болды. Бұл туралы бүгін Алматыда өткен «Ғарыш: ғылым және технология» атты кеңес барысында ҚР Ұлттық ғарыш агенттігінің басшысыТалғат Мұсабаев айтты.

«Биыл Қазақстан 3 ғарыштық аппарат: «KazSat-3» байланыс аппараты мен 2 жерді қашықтан зондтау аппаратын ұшырмақ. Аталған аппараттарды Қазақстанның тапсырысы бойынша француздық Defence and Space компаниясы жасап шығарған. Жерді қашықтан зондтау аппараттары Францияның «Куру» ғарыш айлағынан ұшырылады»,- деп мәлімдеді Т. Мұсабаев.

Оның айтуынша, жерді бақылау аппараты кеңістікті барлауда мүмкіндігі өте жоғары спутник болып табылады. Ол табиғи және ауылшаруашылық ресурстарын бақылауға әрі картографиялық деректерді жинауға арналған.

«Қазіргі таңда дамушы мемлекет ғарыштық технологияларға ие болуы шарт. Телеарналар мен ұялы байланыс, кең жолақты интернет, навигация барлығы спутниктер арқылы жұмыс істейді. Бізде ғарыш саласының даму қарқыны өте жоғары», - деп қорытындылады Т.Мұсабаев.