Биыл қосымша білім жүйесін дамытудың тұжырымдамалық тәсілдері бекітіледі

АСТАНА. ҚазАқпарат – Биыл қосымша білім беру жүйесін дамытудың тұжырымдамалық тәсілдері бекітіледі. Бұл жайында Мәжіліс депутаттарының сауалына Премьер-Министрдің орынбасары – Еңбек және халықты әлеуметтік қорғау министрі Тамара Дүйсенованың жауабында айтылған, деп хабарлайды ҚазАқпарат тілшісі.

«Республикада 24 мыңнан астам қосымша білім беру педагогтері бар. 2023 жылдың басында қажеттілік 1,5 мыңнан астам педагогті құрайды. Педагогтердің кәсіби өсуін арттыру үшін біліктілікті арттырудың 40 білім беру бағдарламасы әзірленді. Жыл сайынғы біліктілікті арттыру курстарымен 2,5 мыңнан астам қосымша білім беру педагогтері қамтылды. «Педагог мәртебесі туралы» Заң аясында тиісті бейін бойынша кәсіптік білімі бар адамдар жоғары және жоғары оқу орнынан кейінгі білім беру ұйымдарының базасында міндетті түрде қайта даярлаудан өткен кезде педагог қызметкерлерге теңестіріледі», - деп атап өтеді Тамара Дүйсенова жауабында.

Бұдан басқа, министрдің атап өтуінше, Балалар мен ересектерге арналған қосымша білім беру ұйымдары қызметінің үлгілік қағидаларында қосымша білім саласында белгілі бір жұмыс түрін орындау үшін қажетті жаңа немесе өзгертілген кәсіби дағдыларды игеруге тұлғаны дамытуға бағытталған кәсіптік даярлық көзделген.

«Қосымша білім беру саласындағы кадрларды даярлау және қайта даярлау мәселелері қосымша білім беру жүйесін дамытудың тұжырымдамалық тәсілдерінің әзірленіп жатқан жобасында көрсетілген. Оны осы жылы бекіту жоспарланып отыр. Балаларды сапалы қосымша біліммен қамтамасыз ету бойынша жұмыс жалғасуда және Үкіметтің ерекше бақылауында», - деді вице-премьер.

Т.Дүйсенова сондай-ақ балалардың шығармашылық және зияткерлік әлеуетін дамыту үшін 100 жаңа ірі нысан салу бойынша жол картасы әзірленгенін мәлім етті.