Біз алдағы қарымта кездесуде клубтың абыройын сақтап қалуға бар күшімізді саламыз - А. Хашманян

АЛМАТЫ. ҚазАқпарат - Біз алдағы қарымта кездесуде клубтың абыройын сақтап қалуға бар күшімізді саламыз. Бұл туралы Алматыда Еуропа Лигасының екінші іріктеу раунды аясында «Қайрат» пен «Алашкерт» командаларының кездесуінен кейін өткен баспасөз мәслихатында армениялық команданың бас бапкері Абраам Хашманян мәлімдеді.

Оның айтуынша, «Қайрат» командасы бұл ойында әділ түрде жеңіске жетті.

«Қайрат» бүгін мықтылық танытты. Жекелей, ойыншылардың атын атап, түсін түстеп жатпаймын. Командада барлық ойыншылардың шеберліктері өте жоғары. «Қайрат» - жоғары міндеттерді орындай алатын команда деп есептеймін», - деді А. Хашманян.

Сонымен қатар, ол өз командасының алдағы қарымта кездесуде лайықты деңгейде ойнауға бар күштерін салатындарын айтты.

«Бүгін команда жеңіске жету үшін қолдан келгеннің барлығын жасады. Бірақ бұл жеткіліксіз болды. Егер ең болмағанда бір гол салғанымызда келесі айналымға шығуға мүмкіндік болар еді. 3:0 есебімен жеңілгеніміз үшін жанкүйерлеріміз алдында кешірім сұраймын. Енді алдағы қарымта кездесуде халқымыз үшін, команданың абыройын сақтап қалу үшін лайықты деңгейде ойнауға күш саламыз», - деді А. Хашманян.

Айта кетелік, Еуропа Лигасының екінші іріктеу раунды аясында «Қайрат» пен «Алашкерт» командалары арасындағы қарымта матч алдағы 23 шілдеде Ереван қаласында өтеді.