Бизнесмендер өз тауарларын шығаруды бірнеше жылға жоспарлай алады -Сұлтанов

АСТАНА. ҚазАқпарат - Қаржы министрі Бақыт Сұлтановтың айтуынша, мемлекеттік және квазимемлекеттік сектордың сатып алуларын бірыңғай жүйеге қосудың арқасында отандық кәсіпкерлер тауар шығару көлемін алдын ала жоспарлай алады, деп хабарлайды ҚазАқпарат тілшісі.

«Жалпы, мына мемлекеттік сатып алуларды алсақ, сосын квазимемлекеттік сектор мен кен-өндіру саласындағы компанияларының сатып алатын тауарлары мен қызметтерін қоссақ, ол деген 13 триллион теңгені құрайды. Енді, берілген тапсырма бойыша біз бизнеске бірнеше жылға қандай тауарлардың сатып алынатынын,  мемлекет болсын, квазимемлекеттік сектор бар, тау-кен өндіруші компаниялар болсын, бірнеше жылдың ішінде кімде қандай сұраныс болады, бағалар қалай болады, кім қатысады, соның барлығына бір жерден, «бір терезе» қағидаты бойынша ақпарат берілетін болады. Осының арқасында инвесторлар да, отандық бизнес те өздерінің стратегиялық жұмыстарын ұзақ мерзімге жоспарлай алады. Сондықтан осындай жағдай жасау үшін заңнамалық өзгерістер керек», - деді Сұлтанов Үкімет отырысынан кейінгі баспасөз мәслихатында.

Айта кетейік, бүгін Премьер-Министр Бақытжан Сағынтаев үкіметтен преференция сұрап алып, отандық өнімдерді алмайтын компанияларды қатты сынады. Осыған байланысты ол бір аптаның ішінде «Самұрық-Қазына» қорына кіретін квазимемлекеттік компаниялардың сатып алуларына қатысты ортақ ережелерді әзірлеуді тапсырды.

 Ағымдағы жылдың бірінші тоқсанында қаржы министрлігі тиісті заң жобасын даярлауға міндетті .