«Бизнестің жол картасы-2020» бағдарламасы бойынша банктерден берілген субсидиялардың 15,88 пайызы Қазақстан халық банкінің үлесінде

АЛМАТЫ. 29 қаңтар. ҚазАқпарат - Қазақстан халық банкінде, 4 қаңтардағы мәлімет бойынша, «Бизнестің жол картасы - 2020» мемлекеттік бағдарламасы аясында берілген 418 өтінімнің 400-і мақұлданды. Оның басым көпшілігі Алматы, Ақтөбе, Қызылорда және Шығыс Қазақстан облыстарынан болып отыр. Қаржы институтының баспасөз қызметінің хабарлауынша, қазіргі таңда 245 заемшы аталған бағдарлама бойынша субсидия алуда. 2012 жылы 211 өтінім қабылданып, 149 заемшыға субсидия беру жүзеге асырылған еді.

Қазақстан халық банкі «Бизнестің жол картасы - 2020» бағдарламасы шеңберінде берілген субсидиялар ауқымы мен несиелік қоржын көлемінің көрсеткіші бойынша көш бастап келеді. Клиенттерге аударылған субсидия сомасының көлемінде банктің үлесі 18,52 пайыз немесе 5 млрд. теңге, ал заемшылардың несиелік қоржынының үлесі 102,8 млрд. теңгені құрады. Бұл бағдарламаға қатысушы екінші деңгейлі банктер клиенттеріне тиесілі жалпы несиелік қоржын көлемінің 15,88 пайызын құрайды.

Субсидияланатын жобалардың құрылымында өңдеу өнеркәсібіндегі, көлік және қоймаларды жалдау секторындағы, сондай-ақ агроөнеркәсіп кешенінде қолға алынған жобалар басым болып келеді. Банк қарастыру үшін клиенттерден қабылдап алған және Аймақтық үйлестіру кеңесі Экономикалық даму және сауда министрлігі мақұлдаған жобалар саны жағынан көш бастаушылар қатарында тұр. Нақты айтқанда, жобалардың жалпылама көлемі және аталған бағдарламаның 1-ші, 2-ші және 3-ші бағыттарына сәйкес мақұлданған жобалар саны бойынша екінші орынды иемденіп отыр.