БҚО: Березовтық тұрғындар Жаңақалада ем алуда

ОРАЛ. ҚазАқпарат - Бөрлі ауданы Березов ауылында балалардың жаппай улану оқиғасынан кейін ересек тұрғындар да сауықтырылуда.

Қазіргі кезде Жаңақала ауданы орталығы Жаңақала ауылындағы ауданаралық сауықтыру орталығында березовтық 20 адам ем алуда, соның ішінде төрт отбасы бар.

Орталық дәрігері Гүлшат Есенқызының сөзіне қарағанда, олардың жағдайлары қалыпты, көңіл-күйлері де көтеріңкі. Алғашқы үш күнде ортаға бейімделсе, одан кейін емдерін алуда. Әрқайсысының диагнозына қарай түрлі ем шаралары қолданылуда. Жаңақаладағы сауықтыру орталығында алып жатқан емдеріне көңілдері толатынын березовтық тұрғындардың өздері де айтып отыр.

14 қаңтарда Березов ауылынан тағы жиырма тұрғын келіп, ем алады деп жоспарлануда.