БҚО бойынша кедендік бақылау департаменті кинологтар арасында байқау өткізді

ОРАЛ. 24 қаңтар. ҚазАқпарат /Елжан Ералы/ - БҚО бойынша кедендік бақылау департаменті кинолог-мамандардың кәсіби біліктілігі мен даярлығын арттыруға үнемі көңіл бөліп келеді.

Департаменттің баспасөз қызметінен түскен мәліметке қарағанда, осы мақсатта кинологтар арасында байқау өткізілген. Оған иттерімен сегіз маман қатысып, жеті минут ішінде автокөлікте жасырылған «марихуана» мен мекенжайдағы «героинді» табуға тиісті болды. Сайыс қорытындысында есірткі заттары контрабандасымен күрес бөлімінің маманы Ербол Аймағанбетов жеңіске жетті, оған Чикколина атты неміс овчаркасы көмектесті.

Жалпы, 2010 жылы департамент қызметкерлері шекара асып бара жатқан есірткінің 40 айналымына тосқауыл қойып, сол бойынша 21 қылмыстық іс қозғады.