БҚО-да 1195 азаматтық іс медиацияның көмегімен қаралды
Онда мәлім болғанындай, «Халықаралық құқық қорғау орталығы» қоғамдық бірлестігі халықтың әлеуметтік мәселелерін шешу бағытында ұсыныс-пікірлерді жинақтау үшін осындай шараларды еліміздің барлық облыстарында ұйымдастырып келеді. Бұл ұсыныстар кейін заңнаманы өзгерту үшін енгізілмек. Қазақстанда «Медиация туралы» Заң 2011 жылы 5 тамызда қабылданғанымен, медиация іс жүзінде кеңінен қолданыс таба қойған жоқ.
Шара барысында «Қазақстан медиаторлары қауымдастығы» ЗТБ бас директоры, «Халықаралық құқық қорғау орталығы» ҚБ басшысы Жанділда Жақыпов «Әлеуметтік мәселелерді шешу және қоғамда тұрақтылық пен келісімді сақтау үшін медиация институтын қолдану» атты мемлекеттік грант аясында республикалық жобаны таныстырды. Оның айтуынша, медиация мүмкіндіктерін кеңінен пайдалану, ел бірлігін нығайту жолында мемлекет пен үкіметтік емес ұйымдардың тиімді әріптестігі тетіктерін дамыту мақсатында қолға алынған жобаны жүзеге асыру барысында мақсатты топтармен кездесулер ұйымдастырылуда. Соның нәтижесінде шешілуі тиісті өзекті мәселелер айқындалатын болады. Сондай-ақ медиацияны тиімді қолдану мен таластарды табысты шешу үшін кәсіби емес және кәсіби медиаторлар үшін оқыту семинарлары өткізіледі.
Облыстық сот судьясы Ерлан Идировтың баян еткеніндей, биыл Батыс Қазақстан облысында 1195 азаматтық іс медиация көмегімен қаралған. Бұл бағыттағы жұмыстар одан әрі жалғасын таппақ.
Дөңгелек үстел отырысынан кейін облыстағы кәсіби емес медиаторлар үшін оқыту семинары да ұйымдастырылды.
Айта кетейік, аталмыш жоба аясында Астана, Алматы қалалары мен облыстарда 16 медиация мен құқық орталығы жұмыс жасамақ. Онда заңгерлер мен медиаторлар әлеуметтік жағынан аз қамтылған тұрғындарға тегін қызмет көрсетеді. Оралда осындай орталық ашылып, жұмыс жасауда.