БҚО-да 241 мыңға жуық адам коронавирусқа қарсы вакцина алды
БҚО денсаулық сақтау басқармасының баспасөз қызметі мәлім еткеніндей, бұл – облыс бойынша егілуге тиісті тұрғындардың (414 389) 58,2 пайызы.
Орал қаласында барлығы 224 092 адам егілуі керек болса, соның 124 192-сі алғашқы екпесін салдырды. Сондай-ақ Бөрлі ауданында 34 105 тұрғынның 23 469-ы, Бәйтеректе 29 999 адамның 17 993-і бірінші компонентпен егілді.
Өткен тәулікте 613 адам бірінші компонентті қабылдаса, соның 18-і – созылмалы дерті бар адамдар.
Басқарма мәліметіне қарағанда, пандемия басталғаннан бері барлығы 39 223 науқас тіркелді.
Қазіргі таңда 511 адам амбулаторлық ем алуда. Облыс стационарларында жатқан 153 науқастың 15-і ауыр халде. Соның ішінде біреуі инвазивті жасанды тыныс алу аппаратына қосылған.
Еске сала кетейік, бұдан бұрын БҚО-да жыл басынан бері коронавирус жұқтырғандар саны 30 мыңға жуықтағанын жазған болатынбыз.