БҚО-да 600-ден астам қыз бала адам папилломасы вирусына қарсы егілді

ОРАЛ. KAZINFORM – Батыс Қазақстан облысында ҚР бас мемлекеттік санитариялық дәрігерінің «Адам папилломасы вирусына қарсы вакцинасын ұйымдастыру және жүргізу туралы» № 11 қаулысына сәйкес қыркүйек айынан бастап 11 жастағы қыздарға вакцинация жүргізілуде.

БҚО санитариялық-эпидемиологиялық бақылау департаменті басшысының орынбасары Нұрлыбек Мұстаевтың өңірлік коммуникациялар қызметі алаңында өткен брифингте мәлім еткеніндей, сонымен қатар вакцинациядан өтпеген 12, 13 жастағы қыздарға да осындай екпе жасалады.

Нұрлыбек Ермекұлының сөзіне қарағанда, ҚР Үкіметінің 2020 жылғы 24 қыркүйектегі № 612 қаулысына сәйкес жатыр мойны обырының негізгі қоздырғышы – адам папилломасы вирусына қарсы вакцинация еліміздің ұлттық екпелер күнтізбесіне енгізілді.

«Күні бүгінге дейін облыс бойынша 11, 12 және 13 жасқа толған 634 қыз екпе алды. Өңірде 11 жастағы 5 мыңға жуық қыз бала тіркелген. Осыған орай облысқа 5 500 доза жеткізілді. Жатыр мойны қатерлі ісігінің алдын алу үшін вакцина алу қажет. Сондықтан бұл ретте ата-аналардың дұрыс шешім қабылдағаны маңызды», дейді Н.Мұстаев.

Оның айтуынша, жұқпалы инфекциялар бойынша жағдай үнемі бақылауда.

«Биылғы тоғыз айда өңірде 1 235 адамның қызылша ауруына шалдыққаны тіркелді. Тамыз айынан бастап бұл дертпен сырқаттанушылық деңгейі төмендеп келеді, аптасына 2-3 адам ауыруда. Қызылша бойынша эпидемиологиялық ахуалды тұрақтандыру үшін 1 жастағыларға вакцинация, 6 жастағыларға ревакцинация және қосымша жаппай иммундау жүргізілуде. Облыста көкжөтел бойынша жағдай тұрақсыз күйінде қалып отыр. Тоғыз айда 38 адам көкжөтелмен сырқаттанса, соның 37-сі немесе 97 пайызы – 14 жасқа дейінгілер. Жалпы ауырғандардың 35-і немесе 92-сі екпе алмаған. Осы уақытқа дейін түрлі себептермен уақытында егілмеген 1 723 балаға екпе жасалды», деді Н.Мұстаев.

Еске сала кетейік, бұдан бұрын Батыс Қазақстанда жатыр мойны обырынан өлім көрсеткіші 33,3 пайызға өсіп отырғанын жазған болатынбыз.