БҚО-да «А» корпусының кадр резервіне үміткерлермен әңгімелесу өткізілді

ОРАЛ. 31 мамыр. ҚазАқпарат - Елбасының «ҚР Президенті жанындағы Кадр саясаты жөніндегі ұлттық комиссия және облыстардың, астананың, республикалық маңызы бар қаланың кадр комиссиялары туралы» Жарлығына сәйкес 30 мамыр күні Батыс Қазақстан облысының кадр комиссиясы «А» корпусының кадр резервіне орналасуға үміткерлермен әңгімелесу өткізді.

Комиссияның жұмыс органынан түскен мәліметке қарағанда, әңгімелесудің басты мақсаты үміткердің жеке басының қасиеттері мен басқарушылық қабілеттерін анықтау болып табылады. Әңгімелесуге 20 үміткер қатысты. Олардың арасында 7 аудан әкімі, облыстық тексеру комисиясының 2 мүшесі, әртүрлі деңгейдегі 8 мемлекеттік қызметші, 1 мәслихат хатшысы және мемлекеттік емес сектордан 2 үміткер болды.

Әңгімелесу қорытындысы бойынша ҚР Президенті жанындағы Кадр саясаты жөніндегі ұлттық комиссияға ұсыныс жасалды. «А» корпусының резервіне ұсыну жөніндегі шешім қабылдау ұлттық комиссия құзыретінде.