БҚО-да ағын суға байланысты елді мекенмен көлік қозғалысы тоқтатылды
ОРАЛ. KAZINFORM – Қаратөбе ауданы Қаракөл ауылдық округіне қарасты Ақтайсай елді мекені маңындағы өткелдің үстінен қар суы екінші рет өтті.
Қаратөбе ауданы әкімінің орынбасары Мұхтар Шайжановтың мәлім еткеніндей, су Таян өзеніндегі өткелдің үстінен 15 наурыз күні өтті. Содан кейін 16 наурызда күндіз басылғанымен, кешке қарай қайтадан су өте бастады.
- Оқиға орнында тәулік бойы кезекшілік ұйымдастырылды. Созылмалы ауруы бар адамдарды, аяғы ауыр әйелдерді аудан мен облыс орталығына жеткіздік. Ауыл мен аудан орталығы арасындағы көлік қозғалысы уақытша тоқтатылды. Жағдайды бүгін таңда тағы бір бағамдайтын боламыз. Ақтайсай биікте орналасқандықтан, елді мекенге қауіп жоқ, - деді Kazinform тілшісіне М.Шайжанов.
Тұрғындардың сөзіне қарағанда, осындай жағдай жыл сайын көктемде қайталанады.
– Біздің ауылдың сайы терең. Сондықтан су Ақтайсайға кірмейді. Бірақ сол сайда топырақтан салынған өткел бар. Соны жылда су шайып кетеді. Биыл да солай болып отыр. Ауданмен екі ортада грейдер жол бар, соның ауылдан бастап 11 шақырымына құм-қиыршық тас қоспасы дұрыс төселмеген. Езіліп, балшық болып кетеді. Көктем мен күзде өте қиын, - деді Ақтайсай ауылының тұрғыны Ғабит Байниязов.
Еске сала кетейік, бұдан бұрын Жайық өзеніндегі су деңгейі бір тәулікте Оралда 40 сантиметрге көтерілгенін жазған болатынбыз.
Батыс Қазақстанда ауыл маңындағы көпірді су шайып кетті.
