БҚО-да АИТВ жұқтырып, ем қабылдаудан бас тартқан 10 адам іздестіріліп жатыр
ОРАЛ. KAZINFORM — Батыс Қазақстан облысында 1 қазандағы мәлімет бойынша, диспансерлік есепте тұрған, алайда антиретровирустық (АРВ) терапияны қабылдамаған 10 пациент медициналық бақылаудан тыс қалған.
БҚО денсаулық сақтау басқармасынан мәлім еткеніндей, бұлардың қатарында жұмыс бабымен көршілес мемлекеттерге немесе Қазақстан Республикасының басқа өңірлеріне кеткен, сондай-ақ тұрғылықты жері белгісіз адамдар бар. Алайда олар облыстағы медициналық ұйымдардан есептен шықпаған.
Аталған пациенттердің орналасқан жерін анықтау және медициналық бақылауға қайта тарту мақсатында көші-қон қызметімен, полиция департаментімен бірлесіп жұмыс жүргізіліп жатыр. Сонымен қатар халыққа қызмет көрсету орталықтары арқылы азаматтық хал актілерін тіркеу деректері және медициналық ақпараттық жүйелер негізінде іздестіру шаралары жүзеге асырылу үстінде.
- АРВ терапиясын қабылдаудан бас тартқан пациенттермен емді қайта бастау және медициналық бақылауға тарту мақсатында мультидисциплинарлық топ жұмыс істейді. Оның құрамына дәрігер, психолог, әлеуметтік қызметкер және патронаждық мейіргер кіреді, - деп хабарлады ведомстводан.
Еске сала кетейік, бұдан бұрын БҚО-да 40-тан астам адамның АИТВ инфекциясын жұқтырғаны тіркелгенін жазған едік.
