БҚО-да бір оқушы екіншісіне пышақ сұғып алған

ОРАЛ. KAZINFORM — Батыс Қазақстан облысында мектеп оқушысының бұзақылық іс-әрекетіне қатысты қылмыстық іс қозғалды.

Тұрғындардың сөзіне қарағанда, оқиға бүгін Теректі ауданы Подстепный ауылында болды. Бір оқушы екіншісіне пышақ сұғып алған. 

БҚО полиция департаменті баспасөз қызметінің нақтылауынша, Теректі ауданы мектептерінің бірінде болған бұзақылық іс-әрекетке байланысты қылмыстық іс қозғалды. 

Алдын ала мәлімет бойынша оқушылар арасында өзара келіспеушілік негізінде жанжал туындаған.

Қазіргі кезде аталған дерек бойынша оқиғаның мән-жайын толық анықтауға бағытталған сотқа дейінгі тергеу амалдары жүргізіліп жатыр.

— Күдікті оқушы ұсталып, полиция бөліміне жеткізілді. Жанжалға қатысы бар кәмелетке толмаған жасөспірімдердің заңды өкілдері балаларды тәрбиелеу бойынша міндетін тиісінше орындамағаны үшін жауапкершілікке тартылатын болады. Материалдар сондай-ақ қосымша шаралар қабылдау және осындай құқық бұзушылыққа жол бермеу үшін аудан әкімдігі жанындағы кәмелетке толмағандар істері жөніндегі комиссияға жіберілді. Қылмыстық істі тергеу барысы БҚО полиция департаменті басшылығының ерекше бақылауында, — деп хабарлады ведомстводан.

Қазіргі кезде оқиғаның мән-жайы анықталу үстінде. 

Еске сала кетейік, бұдан бұрын БҚО-да екі күн ішінде бұрын іздеуде болған 13 күдікті ұсталғанын жазған едік.