БҚО-да денсаулық сақтау саласында 180 маман жетіспейді
ОРАЛ. KAZINFORM — Батыс Қазақстан облысында 7 мыңнан астам медицина қызметкері жұмыс істейді.
БҚО денсаулық сақтау басқармасы басшысының орынбасары Айнаш Ғұбайдуллинаның өңірлік коммуникациялар қызметі ұйымдастырған дөңгелек үстел отырысында мәлім еткеніндей, соның ішінде 1 774-і дәрігер болса, 6 513-і – медицина мамандары.
Айнаш Жұбанышқызының сөзіне қарағанда, қазіргі таңда облыста 180 дәрігер маманның жетіспеушілігі байқалады.
Дегенмен өңір басшысының қолдауымен жергілікті қаражат есебінен жас мамандарды жұмысқа тарту бойынша іс-шаралар жүргізіліп келеді.
- Соның нәтижесінде 2022 жылдан бері 393 дәрігер келсе, соның 207-сі немесе 52,6 пайызы ауылдық жерлерге жіберілді. 256 маманға 1 млрд 652 млн теңге көлемінде біржолғы көтермеақы берілді. Атап айтқанда, шалғай ауылға барғандарға 8 млн, қалаға келгендерге 5 млн теңгеден тиеді, - деді А.Ғұбайдуллина.
Оның айтуынша, сала кадрларын даярлау бағытында 2022-2024 жылдары резидентураға 505 грант берілген. Жергілікті бюджет есебінен 2017-2024 жылдары жалпы медицина мамандығы бойынша 284 грант, 2021-2024 жылдары резидентураға 42 грант бөлінді.
- Биыл жергілікті қазына есебінен жалпы медицина мамандығына 45 түлекті жіберу жоспарланған. Мұндағы жаңалық, бұрын гранттар тек Ақтөбе медицина университетінде оқуға берілетін еді. Қазіргі таңда Астана мен Алматы қалаларындағы резиндентураға жергілікті бюджеттен – 55, республикадан 240 грант бөлініп отыр. Бұл көрсеткіштер – Ата заңымыз бекіткен басты құндылықтардың бірі – азаматтардың өмірі мен денсаулығын сақтау бағытында мемлекет тарапынан жасалып жатқан нақты қадамдардың айғағы, - деп түйіндеді ойын А.Ғұбайдуллина.
Еске сала кетейік, бұдан бұрын Батыс Қазақстанда 326 дәрігердің жетіспейтінін жазған едік.
