БҚО-да кәсіпкерлік қызметіне заңсыз араласқан департамент басшысы жауапқа тартылды

ОРАЛ. KAZINFORM – БҚО техникалық реттеу және метрология департаментінің басшысы әкімшілік жауапкершілікке тартылды.

БҚО прокуратурасының баспасөз қызметінен мәлім еткеніндей, департамент техникалық ережелерді бұзғаны үшін «Орал сүт зауыты» ЖШС-ның декларациясын 1 ай мерзімге тоқтата тұру туралы бұйрық шығарған.

Талдау барысында аталған бұйрықтың қолданыстағы заңнаманы бұза отырып шығарылғаны және кәсіпкердің қызметін шектейтіні анықталды. 

Атап айтқанда, департамент гендік түрлендірілген организмдер арқылы алынған компоненттердің тағамдық өнімдерінде болуы туралы ақпаратты көрсету қажеттілігін көрсеткен. Алайда азық-түлік өнімдерінің ерекше белгілерін таңбалау тек ерікті түрде көрсетіледі. 

— Облыстық прокуратураның наразылығы бойынша департамент бұйрығының күші жойылды. Кәсіпкерлік қызметке заңсыз араласқаны үшін департамент басшысы Әкімшілік құқық бұзушылық туралы кодексінің 173-бабына сәйкес жауапқа тартылып, оған 196,6 мың теңге айыппұл салынды. Осылайша, кәсіпкер құқығы қалпына келтірілді, — деп хабарлады ведомстводан.

Еске сала кетейік, бұдан бұрын БҚО-да демеушілік қаражаттың жұмсалуына байланысты қылмыстық іс қозғалғанын жазған болатынбыз.