БҚО-да шатырларындағы мұз сүңгілері құлауы мүмкін тұрғын үйлер мен ғимараттар маңына ескерту белгілері қойылмақ
Соңғы кезде Батыс Қазақстан облысында қар қалың түсіп, тұрғын үйлер және әкімшілік ғимараттары шатырларында едәуір қар жиналып, қауіп туғызуда.
«Шатырларға жиналған қардың және мұз сүңгілерінің түсуіне, олардың салмағынан ғимараттардың зақымдануына байланысты төтенше жағдайларға жол бермеу мақсатында алдын алу жұмыстары жүргізілуде. Барлық әкімдіктерге елді мекендерді қардан тазарту, шатырлардан қар және мұз сүңгілерін түсіруді ұйымдастыру жөнінде нұсқаулар берілді. Пәтер иелері кооперативтерінің, адамдар көп жиналатын нысандардың, білім беру және мектепке дейінгі мекемелердің басшыларына мұз сүңгілерінің құлауы мүмкін жерлерге ескерту белгілерін, ленталар қою міндеттелді», делінген хабарламада. Бұл шаралардың негізгі мақсат - қыс және көктем мезгілінде ТЖ алдын алу, адамдардың жарақаттанып, зардап шегуіне жол бермеу.