БҚО-да тасқын кезінде сібір жарасы көмінділерінен қауіп жоқ — ветеринарлар

ОРАЛ. KAZINFORM — Батыс Қазақстан облысының ветеринария басқармасы аудандардағы су басқан жерлерде орналасқан сібір жарасы көмінділері жайында осыған дейін таралып кеткен ақпаратқа түсініктеме берді.

Басқарма басшысының орынбасары Абзал Бралиевтің айтуынша, бүгінгі таңда аудандарда ветеринарлық қызмет жергілікті атқарушы органдармен бірлесіп, өлген үй жануарларының көзін жою жұмысын бастаған. 

— Басқарманың бөлім басшысының бұдан бұрын берген ақпаратына түсінік бергім келді. Бүгінгі таңда өңірде 13 емес, үш көмінді су астында қалды. Ал ауру қоздырғыштары еріген сумен таралады деген сөз шындыққа жанаспайды. Өйткені көмінділердің барлығы ветеринариялық-санитариялық талаптарға сай: бетондалған және қоршалған. Ешқандай қауіп жоқ, — деді облыстық ветеринария басқармасы басшысының орынбасары.

Басқарма берген ақпаратқа қарағанда, ветеринариялық қызметтер су тасқынынан өлген ауыл шаруашылығы жануарларын ветеринариялық-санитариялық талаптар бойынша жою жұмысын жүргізуде. Жағдай бақылауда.

Еске сала кетейік, бұдан бұрын БҚО әкімінің орынбасары су тасқынынан зардап шеккен тұрғындардан өтініштер қабылданып жатырғанын айтқаны туралы жазған болатынбыз. 

Онда облыс әкімінің орынбасары Қалияр Айтмұхамбетов аудандарда шығынға ұшыраған 115 бас ірі қара, 1 246 ұсақ мал, 23 жылқы, 81 үй құсының өлекселері өртеліп, арнайы қазылған шұңқырларға көмілгенін келтірген еді.