БҚО-да үш бірдей әлеуметтік нысан пайдалануға берілмек
Облыстық құрылыс басқармасы өндірістік-техникалық бөлімінің басшысы Әлібек Антазиевтің айтуынша, аталмыш нысандардың ішінде ең үлкені - Орал қаласында бой көтеріп жатқан оқушылар және жастар сарайы. Құны 2,841 млрд. теңгеге бағаланған ірі нысанды «Альтаир» ЖШС салуда. Сол секілді Ақсай қаласында дене шынықтыру және сауықтыру кешені құрылысы аяқталып келеді. 866,526 млн. теңгенің нысанын «АТК» компаниясы тұрғызуда. Бұл екі нысан да «ҚПО б.в.» қаржысына салынуда.
Зеленов ауданы Озерный ауылында жергілікті бюджет есебінен 48 орындық мектепті (217,650 млн. теңге) «Отделстрой» құрылыс фирмасы пайдалануға бермекші.
Жалпы, биыл барлық қаржы көздерінен әлеуметтік нысандар құрылысына 1429,663 млн. теңге бөлінген. Соның ішінде 1142,580 млн. теңге жергілікті қазынадан, 287,083 млн. теңге Ұлттық қордан қаралған. Бұған дейін үш нысанның құрылысы тәмамдалды. Олардың екеуі балабақша болса, біреуі - Оралдағы қалалық көпбейінді аурухана.
Еске сала кетейік, оқушылар және жастар сарайынан Рио олимпиадасының чемпионы, Батыс Қазақстанның түлегі Данияр Елеусінов атындағы бокс орталығы да ашылатын болады.