БҚО-дағы тәртіптік кеңес дөрекілік көрсеткен ауыл әкімінің орынбасарын қызметінен босату туралы ұсыныс жасады
Алдымен Зеленов ауданы Дариян ауылдық округі әкімінің орынбасары Мәншүк Баданованың тәртіптік ісі талқыға түсті. Ауылдық округ әкімі аппараты қызметкерлерінің шағымын тексеру барысында анықталғанындай, М.Баданова қызмет бабында дөрекілік көрсеткен. Сонымен қатар ақылы қоғамдық қызметке тартылған адамдарды қонақ күтуге пайдаланған. Мейманының ұялы телефоны жоғалуын күтушінің бірі Г.Күмісқалиевадан көріп, оның үйіне барып, анасы мен екеуіне намысына тиетін ауыр сөздер айтқан. Ауыл әкімі орынбасарының дөрекі мінез-құлқының бар екендігін мәдениет үйінің директоры мен қызметкері растаған. Оған қоса ауыл әкімі Б.Ерболатов та түсініктемесінде М.Баданованы теріс жағынан сипаттаған. Осылардың бәрін ескере келе, тәртіптік кеңес Ар-намыс кодексі талаптарын бұзғаны үшін оны қызметінен босату туралы ұсыныс жасады.
Құрамында Ақжайық ауданы әкімінің орынбасары Тимур Шыниязов, аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Сәкен Ашабаев, аудан әкімі аппараты персоналды басқару қызметі бөлімінің басшысы Орынша Бақтығалиева бар комиссия тұрғын үйді жекешелендіруге беру жөнінде заңсыз шешім шығарған. Сондай-ақ міндетті құжаттар тізіліміне енгізілмеген анықтаманы сұратқан. Осыған орай «Сыбайлас жемқорлықпен күрес туралы» ҚР Заңы 12-бабы 1-тармағы 8-тармақшасына сәйкес аталған қызметкерлерге қызметіне толық сәйкес еместігі туралы ескерту беру ұсынылды. Сол секілді «Бөрлі» ауданаралық туберкулезге қарсы ауруханасының бас дәрігері Марат Қоянов өнімдер жеткізілмесе де, алдын ала төлемдер жасаған. Өзінің айтуынша, мемлекетке залал келмесе де, келісімшарт дұрыс жасалмай, заң талаптары бұзылған. Аталған Заңның 12-бабы 1-тармағы 10-тармақшасы негізінде М.Қояновқа да қызметіне толық сәйкес еместігі туралы ескерту беру туралы ұсыныс жасалды.
Отырыста сондай-ақ БҚО бойынша қаржылық бақылау инспекциясы тәртіптік комиссиясының төрағасы Сәкен Қасымовтың есебі тыңдалып, қатерге алынды.