БҚО кәсіпкерлеріне 900 млн. теңге залал келтірген ЖШС директоры қамауға алынды

ОРАЛ. ҚазАқпарат - Орал қалалық сотының қаулысымен ҚР ҚК 177-бабы 4-бөлімі «б» тармағы бойынша айыпталып отырған «AKELLA» ЖШС директоры Алина Хакалоны екі айға қамауға алу туралы санкция берілді.

БҚО сотының баспасөз қызметінен түскен мәліметке қарағанда, «USAID CEED Bulgaria in Kazakhstan» халықаралық компаниясының шағын және орта бизнеске қаржылай тегін қолдау жөніндегі Қазақстандағы бағдарламасының операторы ретінде өзін таныстырған А.Хакало алаяқтық жасау мақсатында 2009 жылы аталмыш ЖШС-ны құрып, БҚО аумағында ауыр қылмыс жасаған.

«USAID» бағдарламасының операторы ретінде А.Хакало «Сауда-Инвест» ЖШС директорымен грант қорын құру жөнінде келісімшартқа отырған. Кейін «Сауда-Инвест» «AKELLA» ЖШС есебіне 150 млн. теңге аударған. Өз кезегінде Хакало 3 млн. теңгені «Сауда-Инвест» ЖШС-ға аударып, қалғанын қолма-қол ақшаға айналдырып алған. Осындай айламен ол басқа да фирма, мекеме-ұйымдармен келісімшартқа отырған. Ақырында БҚО кәсіпкерлеріне 900 млн. теңге көлемінде залал келтірген.