БҚО полиция департаментінің кадрлық құрамында өзгерістер болды

ОРАЛ. KAZINFORM – ҚР Ішкі істер министрінің бұйрығымен БҚО полиция департаментінің жаңа орынбасарлары тағайындалды.

Полиция полковнигі Абылайхан Серіков БҚО полиция департаменті бастығының жедел жұмыстар жөніндегі орынбасары болды.

БҚО полиция департаментінің баспасөз қызметінен мәлім еткеніндей, Абылайхан Серікұлы ішкі істер органдарында 1997 жылдан бастап қызмет етеді.

Еңбек жолын учаскелік полиция инспекторы лауазымынан бастап, басшы лауазымдарға дейін көтеріліп, Қаратөбе және Ақжайық полиция бөлімдерін басқарды.

Бұған дейін ол БҚО ПД бастығының жалпы мәселелер бойынша орынбасары қызметін атқарған.

Абылайхан Серіков жедел қызметтердің жұмысына, атап айтқанда, криминалдық полиция, ұйымдасқан қылмысқа, есірткі қылмысына, экстремизмге қарсы іс-қимыл басқармаларына жетекшілік етеді.

Сонымен қатар министрдің бұйрығымен полиция полковнигі Қуат Қарағойшиев БҚО полиция департаменті бастығының жалпы мәселелер жөніндегі орынбасары болып тағайындалды.

Қуат Амангелдіұлы ішкі істер органдарында 1996 жылдан бастап қызмет етеді.

Полиция қызметіндегі еңбек жолында қарапайым бухгалтерден БҚО ПД қаржымен қамтамасыз ету басқармасының бастығы лауазымына дейін көтерілді.

Қуат Қарағойшиев тылды басқару және қаржымен қамтамасыз ету, ақпараттандыру және байланыс басқармасының жұмысына жетекшілік етеді.

Еске сала кетейік, бұдан бұрын БҚО-да қай саланың адамдары алаяққа жиі алданатынын жазған болатынбыз.