БҚО статистика департаментінде заңды тұлғаларға статистикалық карточканы беруді тоқтату мәселесіне арналған кеңес болды
деп хабарлайды ҚазАқпарат тілшісі.
Халыққа қызмет көрсету орталықтары, әділет және салық департаменті, Орал қалалық салық басқармасы, сондай-ақ 16 банк өкілдері қатысқан кеңесте статистика департаменті бастығының орынбасары Болтай Әлімбаеваның мәлім еткеніндей, «Мемлекеттік статистика туралы» ҚР Заңына сәйкес сәуірдің 16-сынан бастап статкарта беру тоқтатылады. Оның орнына бизнес сәйкестендіру нөмірі ( БСН ) енгізіліп, барлық жұмыс электронды түрде жүргізіледі. Бұл әлдеқайда тиімді болмақ.
Заңды тұлғалар, филиалдар мен өкілдіктерді бірыңғай сәйкестендіру жүйесіне бір ізбен көшіру мақсатында ҚР Статистика агенттігінің ақпарат жүйесінде екі сәйкестендіру КҰЖС ( кәсіпорын-ұйымдарды жалпы сәйкестендіру ) және БСН кодтары қолданылады. КҰЖС коды берілгені туралы ақпаратқа респонденттер тек ҚР Статистика агенттігі аумақтық бөлімшелеріне тікелей хабарласқаннан кейін ғана қол жеткізе алады.