БҚО жұмыспен қамтуды үйлестіру және әлеуметтік бағдарламалар басқармасына жаңа басшы тағайындалды (ФОТО)
Бүгін жаңа басшыны басқарма ұжымына таныстырып, қызметіне сәттілік тілеген облыс әкімінің атап өткеніндей, Жанболат Иманғалиевтің мемлекеттік қызметте тәжірибесі мол, біліктілігі де жетеді. Ең бастысы, Елбасы тапсырмаларына сәйкес әлеуметтік салада мемлекет саясатын жүргізу, жұмыссыздықты азайту, тұрғындарды барынша жұмыспен қамтып, әл-ауқатын арттыру бағытында жауапкершілікпен, тынбай жұмыстану керек.
Ж.Ғ. Иманғалиев 1969 жылы Ақжайық ауданында дүниеге келген, қос бірдей жоғары білімі бар. 1995 жылы Ақтөбе мемлекеттік медициналық институтын дәрігер-педиатр, 2009 жылы Еуразия академиясын экономика бакалавры мамандығы бойынша бітірген.
1995-1996 жылдары облыстық балалар ауруханасында дәрігер-педиатр, 1996-2004 жылдары дәрігер-реаниматолог қызметін атқарған ол содан кейін басшылық қызметке ауысты. 2004-2007 жылдары - облыстық балалар ауруханасы директорының орынбасары, 2007-2009 жылдары - облыстық денсаулық сақтау басқармасының бас маманы, бастықтың орынбасары, ал 2009 жылдан ҚР Денсаулық сақтау және әлеуметтік даму министрлігі Медициналық және фармацевтикалық қызметті бақылау комитеті облыстық департаментінің директоры болды.