Блогерлер туралы заң күшіне енеді

АСТАНА. ҚазАқпарат - Ресейде танымал блогерлердің қадағалау комитетінің тізіліміне тіркелуі мен оларды жартылай журналистер санатына жатқызуды қарастыратын заң күшіне енеді.

Ведомствоның баспасөз қызметінен хабарлағандай, елде заңды орындау үшін қажетті техникалық инфрақұрылым толығымен әзір. РФ президенті 2014 жылдың 5 мамырында «антитеррорлық пакет» аясында қол қойған заң арқылы алғаш рет ресейлік заңдарға «блогер» ұғымы енгізіліп отыр. Оған сәйкес, блогер - ғаламтордағы жеке парақшасына көпшілікке қолжетімді бұқаралық ақпаратты жариялайтын тұлға. Тәулігіне жазбаларын 3 мың адам оқитын блогерлер Ресейдің қадағалау комитетінің тізіліміне енгізілуі тиіс, деп хабарлайды ИТАР-ТАСС.