Блогерліктен Ақордада салынған картинаға дейін — суретші Әсел Бекжанмен сұхбат
АЛМАТЫ. KAZINFORM — Өзінің шығармашылық жолын тапсырысқа сурет салудан бастап қазір өзінің ерекше картиналары арқылы елге танылған кәсіби суретші, өнертану ғылымдарының магистрі, блогер Әсел Бекжанмен (assolyaa) Kazinform тілшісі сұхбаттасты.
— Өзіңіз туралы айтып берсеңіз. Қанша жасыңыздан бастап сурет сала бастадыңыз?
— Мен Алматы қаласында дүниеге келдім. Қазір жасым 30-да. Өнерге, оның ішінде сурет салуға деген сүйіспеншілігім бала кезімнен бар. Сондықтан 14 жылдан астам уақыт осы қабілетімді дамыту үшін білім алдым. Астана қаласындағы Балалар көркем сурет мектебін, кейін Қазақ ұлттық өнер университетінің колледжі мен университетін оқып бітірдім. 2021 жылы Алматы қаласындағы Т.Жүргенов атындағы Қазақ Ұлттық Өнер академиясының ғылыми-педагогикалық магистратурасын тәмамдадым.
— Қай уақыттан бастап әлеуметтік желілерді жүргізе бастадыңыз? Оған не себеп болды?
— Мен жеке блогымды 2021 жылдың қаңтар айында бастадым. Тапсырыспен сурет салудан шаршап, өзім үшін шығармашылықпен айналысамын деп шештім. Менің әлеуметтік желілер үшін арнайы салған алғашқы суретім — «Самалтау» әніне арналған Димаш Құдайбергеннің портреті еді. Осы картинамен 3-4 түрлі бейнежазбаны Tiktok пен Instagram-да жарияладым. Димаштың жанкүйерлері мені бірден қолдады, шамамен 70 мың қаралым болды. Бұл нәтижеге мен қатты таңқалдым және бұл ісімді жалғастыру керек екенін түсіндім.
— Екі қолмен бірдей сурет салуды қалай үйрендіңіз?
— Ол үшін мен көп тәжірибе жасадым. Әртүрлі материалдар мен әдістерді қолдандым. Алдымен бір уақытта 2 портретті салуға тырыстым. Біраз тәжірибеден кейін ол қолымнан келді. Содан кейін бір уақытта 3 портрет салдым. Осы тәжірибелердің нәтижесінде жеке рекордым — бір уақытта 6 портрет болды.
— Әлеуметтік желіде үлкен аудитория жинағаннан кейін өміріңіз қалай өзгерді?
— Шығармашылық адам үшін танымал болу өте маңызды. Ол жаңа жетістіктерге, жаңа биіктерге шабыттандырады. Әлеуметтік желілерде жұмыс істеген 3 жыл ішінде менің суреттеріме деген сұраныс едәуір өсті. Мені барлық жерде адамдар танып, ірі брендтер жұмыс істей бастады. Меніңше, әлеуметтік желілердегі бейнежазбаларым бүкіл өнер саласына оң әсер етуде деп ойлаймын. Бұл мамандықтың жалпы мәртебесін арттырады. Қазір мен шетелде көрмелер де жасаймын. Сондықтан өмірім блогерліктен кейін жақсы жаққа өзгерді.
— Былтыр Мемлекет басшысы Қасым-Жомарт Тоқаев пен Ресей президенті Владимир Путинге сурет салғаныңызды бәріміз көрдік. Осы кездесуге қалай шақырту алдыңыз?
— Кездесуден бірнеше күн бұрын маған Астана қаласының әкімдігінен хабарласты. Олар маған жоғары дәрежелі қонаққа сыйлық ретінде сурет салуға ұсыныс айтты. Басқа ештеңе нақтылаған жоқ. Әрине, мен бірден келістім. Сол күні кешке картина эскизінің бірнеше нұсқасын қарындашпен ақ-қара нұсқада жасап, жібердім. Бір күннен кейін маған Президент әкімшілігінен хабарласып, идея мен эскиз ұнағанын, эскизді түрлі-түсті нұсқада пысықтау керектігін айтты. Солай президенттермен кездесуге тап болдым. Адамдар мен сол жердегі суретті алдын ала дайындап, содан кейін оны ауыстырдым деп ойлайды. Бірақ бұл олай емес. Мемлекет басшылары салған кенепті мен 1 күнде аяқтадым. Мұндай ерекше суретті ауыстыру қисынды болмас еді, президенттермен бірлесіп сурет салудың қандай құндылығы бар екенін елестетіп көріңіз.
— Ақорда мен Кремль арасында көпір суретін бейнелеу идеясы қалай келді?
— Маған салынатын сурет екі елдің достығын бейнелесе деген ұсыныс түсті. Сонда бірден екі жағалау арасындағы көпір туралы ой келді. Өйткені дипломатияда «көпір салу» тіркесі жиі қолданылады. Сондықтан «достық көпірін» салу туралы ойладым. Бұл шын мәнінде таза шабыт. Мен түсіндіре алмайтын нәрсе. Суреттің өлшемі 200×130 см болды. Оны Президенттермен бірге түсте салып бастадым да, келесі күні түскі асқа дейін аяқтадым.
— Әлеуметтік желі арқылы ұлттық мәдениетті, өнерді дәріптеуге не түрткі болды?
— Бұл қазір әлемді мәдени мұрамызбен таныстырудың жалғыз тиімді жолы. Мысалы, менде 13 миллион қаралым жинаған бейнежазба бар. Онда патшайым Томиристің портретін және Гаухар батырдың портретін салдым. Олар екеуі де әдемі қалпында, ұлттық киіммен, ұлттық әшекейлермен салынды. Мұны әлемнің түкпір-түкпірінен 13 миллион адам көрді. Осы 3 жыл ішінде менің парақшаларымда осы іспеттес 350-ден астам видео бар. Сондықтан бұл өте тиімді әдіс, мен оны жалғастыра беремін.
— Қарындаш, қолмен және баллондар арқылы ақ қағазға, кілемге сурет саласыз. Мұндай шығармашылық идеялар қайдан туындайды?
— Иә, мен көп тәжірибе жасаймын. Шығармашыл адам ретінде мен әрқашан жаңашылдықты іздеймін, әлемдегі жаңа трендтерді ұстанамын. Батыста, Шығыста не болып жатқанын көріп, оны өзіме бейімдеуге тырысамын. Әрдайым бір нәрсені өзгертіп, толықтырып, біріктіріп отырамын. Одан жаңа нәрсе болып шығады. Болашақта суретшілерге арналған өндірістік орталығымды ашуды жоспарлап отырмын. Мен жас суретшілерге табысқа жетуге көмектескім келеді. Менің ойымша, әр суретшіге Қазақстанды танымал ету және дәріптеу үшін команда қажет. Сонда екі жыл ішінде біздің елімізде мен сияқты 5-10 суретші пайда болуы мүмкін. Бұл біздің бейнелеу өнеріміздің қайта өрлеу дәуірі болады.
Еске салсақ, былтырғы жылдың 28 қарашасында Қасым-Жомарт Тоқаев Қазақстанға мемлекеттік сапары аяқталған Владимир Путинді елорда әуежайынан шығарып салып, суретші Әсел Сабыржанқызы Ресей президентіне елімізге жасаған сапарына арнап салған картинасын сыйға тартты.
