Богдан Вехов шорт-тректен жасөспірімдер арасындағы әлем чемпионатында қола алды

АСТАНА. KAZINFORM – Қазақстан шорт-тректен Солт-Лейк-Сити қаласында (АҚШ) өтіп жатқан жасөспірімдер арасындағы әлем чемпионатында екінші медальға қол жеткізді.

Ұлттық олимпиадалық комитеттің мәліметінше, бұл жолы ұлттық құрама қоржынына жүлдені Богдан Вехов салды.

Отандасымыз 1000 метр қашықтықта сәтті өнер көрсетті. Вехов 1:24.177 уақыт көрсеткішімен мәре сызығын кесіп, қола жүлдегер атанды.

Алтын медальді Оңтүстік Корея өкілі Пак Соджун (1:23.802) жеңіп алса, күміс жүлде Қытай спортшысы Юйхэн Лиге (1:23.903) бұйырды.

Айта кетейік, бұған дейін Қазақстан әйелдер құрамасы эстафеталық жарыста үшінші орынға ие болған еді.

Бұдан бұрын Ұлттық құрама әйелдер арасындағы 3 000 метрлік эстафетада қола жүлдеге қол жеткізгенін жазғанбыз.