БОКС: «Астана арландары» венесуэлалық «Caciques Venezuela» командасын тізе бүктірді
Бес сайыс та аса тартысты өтті. Жанкүйерлер шаршы алаңға шыққан әрбір боксшымызға қызу қолдау көрсетті. Ал «арландықтар» бүгін аянып қалмады.
Мардан Берікбаев (49 келі) Йоел Финол Ривасты 50:46, 49:46, 48:47 есебімен, Мейірболат Тоитов (56 келі) Хосе Диасты 49:46, 50:45, 50:44, Самат Бәшенов (64 келі) Луис Арконды 49:46, 49:46, 48:47 есебімен жеңсе, Мейірім Нұрсұлтанов (75 келі) Хуан Родригесті төртінші раундта, ал Василий Левит (91 келі) Альфонсо Флоренсті үшінші раундта техникалық нокаутпен жеңді.
Әсіресе, Мейірім Нұрсұлтанов пен Хуан Родригестің жекпе-жегі аса шиеленісті өтті. Мейірім екінші раундта қарсыласын нокдаунға жіберді. Екі боксшы да ашық бокс үлгісін танытты. Алайда қазақстандық былғары қолғап шебері қарсыласын жуытпауға тырысып, тәжірибелі ойын өрнегін көрсетті. Сөйтіп, төртінші раундта қарсыласын техникалық нокаутпен тізе бүктірді.
