Бокстан әлем чемпионатында Алуа Балқыбекова канадалық қарсыласын жеңді

ЫСТАНБҰЛ. ҚазАқпарат - Бокстан әйелдер арасындағы бокстан әлем чемпионатында бүгін, 10 мамырда қазақстандық Алуа Балқыбекова алғашқы жекпе-жегінде жеңіске жетті, деп хабарлайды ҚазАқпарат.

Түркияның Ыстанбұл қаласында өтіп жатқан әлем чемпионатында ел құрамасынан Алуа Балқыбекова (48 келі) канадалық Приянка Диллонмен қолғап түйістірді.

Жекпе-жек барысында ол жақсы ойын көрсетті. Нәтижесінде қарсыласын қапы қалдырып кетті. Осылайша жарыстың келесі сатысына жолдама алды.

Еске салсақ, 8 мамырда ел құрамасынан Валентина Хальзова (70 келі) кениялық Лорна Куса Симбиді тізе бүктірді.

Сондай-ақ, дүбірлі додада еліміздің атынан Назым Қызайбай (50 келі), Жайна Шекербекова (52 келі), Дина Жоламан (54 келі), Карина Ибрагимова (57 келі), Римма Волосенко (60 келі), Аида Әбікеева (63 келі), Дариға Шәкімова (66 келі), Надежда Рябец (75 келі), Гүлсая Ержан (81 келі) және Ләззат Күнгейбаева (81 келіден жоғары) сынға түседі.

Әлем чемпионаты 20 мамырда мәресіне жетеді.