Бокстан әлем чемпионатында Валентина Хальзова алғашқы жеңісіне жетті

ЫСТАНБҰЛ. ҚазАқпарат - Түркияның Ыстанбұл қаласында басталған әйелдер арасындағы бокстан 2022 жылғы әлем чемпионатында қазақстандық Валентина Хальзова алғашқы жеңісіне қол жеткізді, деп хабарлайды ҚазАқпарат.

Ел құрамасынан Валентина Хальзова 70 келі салмақта кениялық Лорна Куса Симбимен қолғап түйістірді.

Кениялық боксшы Валентинаға лайықты қарсылық көрсете алған жоқ.

Жекпе-жек барысында қазақстандық спортшы айқын басымдық көрсетті. Нәтижесінде бірінші раунд аяқталмастан төреші оның қолын көтерді.

Осылайша Валентина Хальзова жарысты жалғастыруға мүмкіндік алды.

Валентина Хальзова 1997 жылы 16 қаңтарда дүниеге келген. Ол 2016 жылы елордамызда өткен әлем чемпионатында 69 келі салмақта чемпион атанған болатын.

Ал 2017 жылы Азияның күміс жүлдегері болды.

Енді 10 мамырда ел құрамасынан Алуа Балқыбекова (48 келі) канадалық Приянка Диллонмен жекпе-жек өткізеді.

Бұған дейін хабарлағанымыздай, дүбірлі додада еліміздің атынан 12 боксшы сынға түседі.

Олардың қатарында Назым Қызайбай (50 келі), Жайна Шекербекова (52 келі), Дина Жоламан (54 келі), Карина Ибрагимова (57 келі), Римма Волосенко (60 келі), Аида Әбікеева (63 келі), Дариға Шәкімова (66 келі), Надежда Рябец (75 келі), Гүлсая Ержан (81 келі) және Ләззат Күнгейбаева (81 келіден жоғары) бар.

Еске салсақ, қазақстандық қалған боксшылар енді алғашқы жекпе-жегінде Колумбия, Пуэрто-Рико, Испания, Финляндия, Алжир, Өзбекстан, Түркия және Украина боксшыларымен кездеседі.

Аталған турнир 1974 жылдан бері тұрақты түрде ұйымдастырылып келеді.

Қазақстан құрамасы қазірге дейін барлығы 51 медаль еншіледі. Олардың 14-і алтын, 15-і күміс, 22-і қола.