Бокстан әлем чемпиондары елге оралды
АЛМАТЫ. KAZINFORM – Бокстан Қазақстан құрамасының қыздары Алматыға ұшып келді.
Алматы халықаралық әуежайында Сербияның Ниш қаласынан қайтқан бокстан әйелдер арасындағы әлем чемпионатының жеңімпаздары мен жүлдегерлерін туған-туыстары, жанкүйерлері салтанатты түрде қарсы алды.
Сербияда тарихи нәтижеге қол жеткізген әлемнің үш дүркін чемпионы, Олимпиаданың қола жүлдегері Назым Қызайбай жарыс туралы ой-пікірін айтты.
- Өте қуаныштымын, арманым болды және мен оған жеттім. Енді кішкене демалып, қайта жаттығуға кірісеміз. Әлемдік додада оңай қарсыластар болмайды. Бірақ 48 келі 50 келіге қарағанда жеңіл болды. Себебі өзімді күштірек сезіндім, - деді Назым Қызайбай.
Бұған дейін әлем біріншілігінің қола мен күміс жүлдесін жеңіп, биыл әлем чемпионы атанған Алуа Балқыбекова жеңіске жету оңай болмағанын атап өтті.
- Алтынға жол оңай болған жоқ. Бұрын қола, күміс болды, енді міне алтын медаль алдым. Қаншама жыл, еңбек кетті. Бапкерлерімнің арқасында осындай жетістікке жетіп отырмын. Алдағы жоспар – тағы да үлкен додаларда жеңіске жету. Бұл жарыстардың барлығы 2028 жылы Лос-Анджелесте өтетін Олимпиадаға дайындық, - деді Алуа Балқыбекова.
Еске салайық, Сербияның Ниш қаласында өткен бокстан әлем чемпионатында жүлде саны жөнінен жалпы командалық есепте екінші орынға табан тірегенін жазғанбыз.
Ел құрамасынан Назым Қызайбай (48 келі), Алуа Балқыбекова (50 келі) және Аида Әбікеева (63 келі) чемпион атанды. Виктория Графеева (60 келі) мен Елдана Тәліпова (81 келіден жоғары) күміс жүлде, ал Наталья Богданова (70 келі) қола жүлде алды.
