Бокстан әлем чемпиондары мен жүлдегерлері қанша сыйақы алады

АСТАНА. KAZINFORM — Сербияның Ниш қаласында өтетін бокстан әйелдер арасындағы әлем біріншілігінің жеңімпаздары мен жүлдегерлері қанша сыйақы алатыны белгілі болды.

Бүгін халықаралық бокс қауымдастығы (IBA) 2025 жылы Ниш қаласында (Сербия) өтетін әйелдер арасындағы бокстан әлем чемпионатының ақшалай жүлдесін жариялады.

Нақтырақ айтсақ, алдағы аталған жаһандық додада жеңіс тұғырының ең биік сатысына көтерілген боксшы 100 мың АҚШ долларына ие болады. Ал күміс жүлдегер атанған боксшылар 50 мың, қола медальға қол жеткізген боксшыларға 25 мың АҚШ доллары көлемінде қаржылай сыйақы берілетіні белгілі болды.

Сондай-ақ, биылдан бастап бокстан әлем чемпионаты тарихында алғаш рет ширек финалға өткен барлық спортшы қаржылай марапатқа ие болмақ. Оларға 10 мың доллар көлемінде сыйақы қарастырылып отыр.

Естеріңізге сала кетейік, Ниш қаласында өтетін әйелдер арасындағы әлем чемпионаты 9-16 наурыз аралығында өтеді. 

Аталған әлемдік додаға Қазақстан құрамасынан ел намысын қорғауға 12 боксшы аттанады.