Бокстан «Странджа» турнирі: Бүгін ел құрамасынан кімдер сынға түседі

АСТАНА. KAZINFORM - Болгарияда өтіп жатқан бокстан «Странджа» турнирінде бүгін, 25 ақпанда ел құрамасынан кімдердің сынға түсетіні белгілі болды.

Халықаралық турнирдің екінші жарыс күнінде қазақстандық 11 боксшы шаршы алаңға шығады. Алдымен 51 келіде Бекзат Алдамжаров франциялық Нике Каммингспен қолғап түйістірсе, 63.5 келіде Ертуған Зейнуллинов болгариялық Владислав Лисовый, Мұхамедсабыр Базарбайұлы грузиялық Саба Ткебучавамен кездеседі.

80 келіде Ерасыл Жақпеков пәкістандық Умаис Икбал, 86 келіде Нұрбек Оралбай болгариялық Мануэль Жечев, Бекзад Нұрдәулетов өзбекстандық Акмалхон Исраилов, 92 келіден жоғары салмақта Айбек Оралбай пәкістандық Тахир Абдул Вакабпен шеберлік байқасады.

Әйелдер құрамасынан Гүлнар Тұрарбай англиялық Оукли Келси, Айдана Жабынбекова (57 келі) хорватиялық Николина Касик, Аружан Жаңабаева (63 келі) Диана Сифра, Анастасия Баязтова (75 келі) франциялық Каммингс Найкпен шаршы алаңға шығады.

Жекпе-жектер Қазақстан уақытымен сағат 17:00-де басталады.

Айта кетсек, жарыстың алғашқы күні, 24 ақпанда ел құрамасынан Дәулет Молдашев (57 келі) 1/8 финалда әзербайжандық Залимхан Сулеймановтан жеңілсе, Санатәлі Төлтаев (67 келі) болгариялық Эмирджан Мехметті қапы қалдырды.

Ал, қарсыластарының бас тартуына байланысты Төрехан Сабырхан мен Серік Теміржанов жекпе-жексіз келесі айналымға жолдама алады.