Болгарияда «Халықаралық ядролық сынақтарға қарсы іс-қимылдар күніне» орай форум өткізілді

СОФИЯ. Тамыздың 30-ы. ҚазАқпарат. Тамыздың 25-інде Софияда Қазақстан Республикасының Болгария Республикасындағы Дипломатиялық миссиясы Болгария Республикасының Сыртқы істер министрлігінің көмегімен «Халықаралық ядролық сынақтарға қарсы іс-қимылдар күніне» орай Болгарияның сыртқы істер министрінің орынбасарының, елдегі дипломатиялық корпус елшілері мен өкілдерінің және іскер және қоғамдық топтардың қатысуымен форум өткізді, деп хабарлайды елшіліктің баспасөз қызметі.

Форум барысында Біріккен Ұлттар Ұйымының 29 тамызды Халықаралық ядролық сынақтарға қарсы іс-қимылдар күні деп белгілеу туралы резолюциясы Қазақстан Республикасының Президенті Нұрсұлтан Назарбаевтың бастамасымен қабалданғаны туралы айтылып, Семей ядролық сынақ полигонының біржола жабылуы мен Қазақстанның әлемдегі ауқымы жөнінен төртінші ядролық арсеналдан ерікті түрде бас тарқандығы туралы айтылды

Сыртқы істер министрінің орынбасары М.Люцканов өз сөзінде Қазақстанның бастамасымен қабылданған БҰҰ резолюциясына ризашылығын білдіріп, ядролық қауіпсіздік бойынша Болгарияның ұстанымымен таныстырды. Болгария ядролық қарусыздану мен таратпау саласында тиянақты саясат жүргізіп келеді. Жаһандық қауіпсіздіктің негізгі мәселесі, болгар сыртқы саясатының басты басымдықтарының бірі - ядролық және басқа да жаппай қырып-жоятын қаруға қарсы күрес.

Іс-шара шеңберінде қазақстандық «Ядролық қарусыз әлемнің бесігі» атты деректі фильм болгар мен ағылшын субтитрлерімен көрермендердің назарына ұсынылып, Семей ядролық полигоны туралы фотокөрме көрсетілді.

Жиынға қатысқан қонақтар Қазақстанның ядролық және басқа да жаппай қырып-жоятын қаруды таратпау мен оны қысқарту, атом энергиясын бейбіт мақсаттарда пайдалану сияқты маңызды мәселелердегі саясатын жоғары бағалап, Қазақстан Президенті ұсынған Ядролық қарусыз әлемнің жалпыға ортақ декларациясын қабылдау туралы мәселені талқылау туралы ұсынысына үлкен қызығушылық танытты.