Боливия генералы сәтсіз төңкерістен кейін қамауға алынды

АСТАНА. KAZINFORM - Боливияда әскерилер ел үкіметін өз бақылауына алуға талпынғанымен мемлекеттік төңкеріс сәтсіз аяқталды, деп жазады The Associated Press.

Елде үш сағат бойы билікті әскери күшпен басып алудың қарқынды сценарийі байқалды. Көшелер әскерилерге толып, бронды техникалар ел астанасы Ла-Пастағы үкімет сарайының есігін қағып, президент Луис Арсе үкіметін бақылауға алды.

Жоғары дәрежелі генерал Хуан Хосе Суньиги әскери күштер елді құртып, оны дағдарысқа апаратын саясаткерлердің әрекеттерінен шаршағанын, осыған байланысты қарулы күштер «нағыз демократияны» қалпына келтіруге ниетті екенін айтты.

Алайда, іс басындағы президентті құлату әрекеті сәтсіз аяқталып, тіпті Л.Арсенің саяси қарсыластары да демократияны қорғау және көтерілісті болдырмау үшін президентті қолдады.

Бір сағат өтпей-ақ президент Л.Арсе армияның, флоттың және әуе күштерінің жаңа басшыларын жариялады, содан кейін әскерлер көтерілісті тоқтатып, шегінді.

Бүлікшіл армияның бас қолбасшысы генерал Х.Суньиги тұтқындалды. Бас прокурор тергеуді бастады. Әскери-теңіз күштерінің вице-адмиралы Хуан Арнес Сальвадор да қамауға алынды.