Бір айда Өзбекстанға 100 мыңнан астам қазақстандық саяхаттап барған
ТАШКЕНТ. KAZINFORM – Биыл қаңтарда Өзбекстанға 678 мыңнан астам шетелдік турист келді, бұл өткен жылдың сәйкес кезіңімен салыстырғанда 30,5%-ға көп, деп хабарлайды Kazinform агенттігінің меншікті тілшісі.
Өзбекстанның Ұлттық статистика комитетінен мәлім еткендей, елге саяхаттап келген шетелдіктердің көбі - Қырғызстан (211,2 мың адам) мен Тәжікстан (200,9 мың адам) азаматтары.
Бұл ретте үштікті Қазақстан түйіндейді. Биыл қаңтарда Өзбекстанда 105,5 мыңнан астам қазақстандық демалысын өткізген.
Туристердің көбі Ташкент, Самарқан, Бұхара және Хиуа қалаларының көрікті жерлеріне саяхаттаған.
Еске салайық, 2024 жылы көршілес ел 2,2 млн қазақстандық саяхатшыны қабылдауды жоспарлаған еді. Дегенмен былтыр 11 айда Өзбекстанға 1,3 миллионнан астам қазақстандық турист келген.
