Бір гектардан түсетін табысты 10 соттық жерден алуға болады — Самат Сұлтанов
ТҮРКІСТАН. KAZINFORM — Түркістан облысында үйінің ауласындағы алақандай жерден мол табыс тауып отырған шаруалар аз емес. Соның бірі Самат Сұлтанов 2 соттық жерден екі тоннадан астам өнім алып отыр. Kazinform қияр мен қызанақ егуді кәсіп еткен шаруамен тілдесті.
Ордабасы ауданына қарасты Қарақұм ауылының тұрғыны Самат Сұлтановтың жылыжайды кәсіп еткеніне 7 жылдың жүзі болған. Бүгінде ол құлпынай өсіреді. Сондай-ақ, қияр мен қызанақ егеді.
Бақшасын суаруға тамшылатып суару технологиясын қолданады. Оған құдықтан шығатын ауыз суды пайдаланады.
— Екі соттық жерге темірден жылыжай салдым. Құрылыс жұмыстары жаз айында бітті. Содан 4 жүйек жасап, құлпынайдың кореялық сортын ектім. Ол қыста пісетін болғандықтан тағы 500 данаға жуық қияр көшетін отырғыздым. 3 айда 2,5 тоннаға жуық өнім алдым. Жылыжайды бастағанда 2,5 млн теңге қаржы жұмсаған болатынмын. Соның 700 мың теңгесін 3 айда өндіріп алдым, — дейді шаруа.
Саматтың үйінің ауласында бос жатқан 15 соттық жері бар. Шаруа соның баршасына жылыжай орналастыруды жоспарлап отыр. Себебі, бұл кәсіптен түсетін қаржы мол.
Әрі қысы-жазы тоқтамай табыс әкеледі.
— Ешқандай несие, субсидия алып отырмағандықтан бірден 15 соттықтың бәріне түгел жылыжай салып тастау мүмкін емес. Оған қомақты қаражатым да жоқ. Тек жыл сайын белгілі бір көлемде жылыжай аумағын ұлғайтып отырамын. Енді 4 соттық қоссам, 6 соттық болады, — дейді ол.
Самат Сағатбекұлы бұрыннан диқаншылықпен айналысқан. Егістік алқабына қауын-қарбыз еккен. Кейін көкөніске ауысты.
Ал жылыжай шаруашылығын 2017 жылдары қолға алады. Ең алдымен егістік алқаптағы 4 соттық жерге ағаштан жылыжай соқты.
Шағын кәсіптен мол қаржы тапқан шаруа бұл кәсіпке түпкілікті көшуді жоспарлады.
— Алғашқыда үй салатын учаскем болмады. Содан егістік алқабында жұмыс істедім. Төбесін кленкамен жауып, қияр ектім. Бір жылда екі рет өнім алдым. Көктем басталысымен қияр мен қызанақ егемін. Жазда жинап алып, екінші рет көшет отырғызамын. Осылайша 3000 түп қияр мен қызанақтан 12 тонна өнім жинаған кезім болды. Жалпы 2 млн теңге таза пайда таптым. Содан, 10-15 соттық жылыжай болса, бір отбасын асыруға болатындығына көзім жетті. Жалпы бір гектардан табатын табысты, 10 соттық жерден алуға болады, — дейді ол.
Бүгінде Самат кәсіби маман. Жыл сайын ғаламтор арқылы тәжірибесін шыңдап, білімін жетілдіріп отырады. Тұрақты тұтынушылар да тапқан.
Әрбір өнімді көтерме бағада сатып алатын адамдары бар. Сондай-ақ, жергілікті тұрғындарды жұмыспен қамтып отыр. Әр ауысымда 10-15 адамды жұмысқа алады.
Жылыжай саламын деген жерлестерін кәсіпке баулып келеді.
— Өзім де көп дүниені ютубтан көріп үйрендім. Орысша түсінбесем де ғаламторды көп қараймын. Жылдан жылға тәжірибе жинақтап жатырмын. Біраз дүниені меңгеріп алдым. Қазір менен ақыл-кеңес сұрайтындар көп. Тіпті телефон нөмірімді тауып алып, еліміздің әр аймағынан хабарласып жатады. Баршасына білгенімді онлайн үйретемін. Желі арқылы жіберген суреттерін қарап, кеңес беріп, бағыт-бағдар көрсетіп отырамын. Мені көрген жора-жолдастарым мен ауылдастарым да жылыжай сала бастады, — дейді ол.
Шаруа гектар-гектар жер алып, ештеңе екпейтін замандастарына ренжиді. Шөп басып, бос жатқан жерлерді көргенде көңілі құлазиды.
— Қазір көп адамдар гектарлаған егістік алқабына егін еккенді құп көреді. Үй ауласындағы жерді азсынады. Бірден үлкен жерге егін егіп, үлкен пайда тапсам деп ойлайды. Бұл да дұрыс шығар. Дегенмен, үйдің ауласынан үлкен пайда табуға болады. Қазір көп үйлердің ауласы шөп басып, бос жатыр. Сол жерге кішкене ғана жылыжай салып алса, үлкен кәсіптің бастауы болар еді. Қазір барлық құрылғы Шымкентте сатылады. Ал, жылыжайда көкөністің барлық түрін өсіруге болады, — дейді Самат Сұлтанов.
Айта кетейік, бұдан бұрын Түркістан облысындағы мақта кластеріне 1400 жұмысшы қажет екенін жазған болатынбыз.
