Бір тілді меңгерген адам екінші тілді де тез үйренеді: Ақтаулық ұстаз өзге тілді меңгерудің сырын айтты
АҚТАУ. KAZINFORM — Ақтау қаласының тұрғыны Гүлбану Қуанышова — бес тілді жетік меңгерген полиглот ұстаз. Өзі ағылшын тілі пәнінен сабақ береді. Оған қоса қазақ, орыс, қытай және түрік тілдерінде еркін сөйлейді. Білім саласында 9 жылдық еңбек өтілі бар маман № 15 мектеп-гимназияда жұмыс істейді.
«Өзге тілдің бәрін біл, өз тіліңді құрметте» деген сөздің жаны бар. Тіл — пікір алмасатын, ой бөлісетін құрал. Бала кезден бірнеше тілді білсем, шетелге саяхаттасам деген арманым болды. Осы арманым мені бірнеше тілді үйренуге жетеледі», — дейді Гүлбану Қуанышова.
Гүлбану Қ.Жұбанов атындағы Ақтөбе өңірлік университетінде білім алған. Бакалаврда оқып жүргенде, арнайы бағдарламамен Қытай Халық Республикасының Шыңжаң қаржы-экономикалық университетінде 2 жыл қытай тілін оқыды. Оқуды аяқтаған соң, ағылшын-қытай тілі маманы атанды.
«Екі жыл Ақтөбеде, екі жыл Қытайда білім алған соң, университетте халықаралық орталықта жұмыс істедім. Шетелдік ғалымдармен, профессорлармен пікір алмасып, бірігіп жұмыс істедік. Осылайша, ағылшын, қытай тілінде еркін сөйлеп, ойымды тиянақты жеткізіп үйрендім. Кейін халықаралық орталықта бауырлас Түркия мемлекетімен іскерлік қарым-қатынас орнаттық. Жұмыс бабына орай түрік тілін де үйренуім керек болды. Ден қойып, түрік тілін де оқыдым. Кейін тағылымдамаларға барып, тәжірибе алмасып, еркін сөйлеп кеттім», — дейді полиглот мұғалім.
Гүлбану тілді жетік үйрену үшін ниет пен қызығушылық керек дейді.
«Тілді үйрену үшін үлкен ниет пен шынайы қызығушылық керек. Шетел тілдерін оқып бастаған адамдарға ең алдымен сол елдің мәдениетімен, салт-дәстүрімен, тұрмыс-тіршілігімен танысқан дұрыс. Сонда ғана тілді тез әрі оңай үйренуге болады. Бір жаңа тілді жетік білген оқушыларыма, замандастарыма екінші жаңа тіл үйреніңіздер деп кеңес беремін. Өйткені, бір тілді меңгерген адам екінші тілді де тез үйреніп кетеді. Оның үстіне жаһандану, жаңа технологиялар заманы да тіл білуді талап етеді. Дәрігер болсаңыз да, инженер болсаңыз да тіл білу артық емес», — дейді ол.
Гүлбану оқушыларының білім қуған бәсекеге қабілетті маман болғанын қалайды.
«Оқушыларымды тек мектеп бағдарламасымен оқытпаймын. Тіл үйренуге деген қызығушылықтарын ояту мақсатында осы күнге дейін бірге жұмыс істеген шетелдік әріптестеріммен онлайн кездесулер, видео форматта сабақ материалдарын ұйымдастырамын. Өйткені, ата тілін қадірлейтін, бірнеше тілді жетік меңгерген азаматтардың өскенін қалаймын. Оқушыларыма тілдік курстардан өтуге, тегін тағылымдамаларға қатысуға әрқашан кеңес беремін», — дейді Гүлбану Қуанышова.
