Бірінші Олимпиадалық киберспорт ойындары 2027 жылы өтеді
АСТАНА. KAZINFORM — Іріктеу жарыстары биыл басталады.
— 2027 жылы Сауд Арабиясының Эр-Рияд қаласында киберспорт әлемі үшін де, Олимпиадалық қозғалыс үшін де маңызды оқиға болатын тұңғыш Олимпиадалық киберспорт ойындары өтеді, — делінген Халықаралық Олимпиада комитеті (ХОК) сайтындағы ақпаратта.
Олимпиадалық киберспорт ойындарын ұйымдастыру үшін ХОК Сауд Арабиясының Олимпиада және Паралимпиада комитетімен ынтымақтасады.
— Енді бізде киберспорт бойынша алғашқы Олимпиадалық ойындардың нақты жол картасы бар, — деді ХОК президенті Томас Бах.
Олимпиадалық киберспорт ойындарын құру туралы шешім өткен жылдың шілдесінде ХОК-тың 142-сессиясында қабылданған. Сол кезде алғашқы ойындар 2025 жылы өтеді деп хабарланған болатын.
Еске салсақ, бұған дейін Алматыда киберспорттан ALMA CUP 2024 турнирі өткенін хабарладық.
